Txantreako Gazte Mugimendua gazteak gazte bezala
konpartitzen dituzten problematikak lantzen dituen kolektiboa da. Adin, perfil
eta interes ezberdinak dituzten auzoko gazteek osatzen dute eta problematika horiek
ezagutarazi eta salatzen dituzte, hauei aurre egiteko alternatibak eraikiz.
Bertako partaideek Gazte Mugimenduaren egoeraren
inguruan eta 2016. urteko erronkei buruz hitz egiten dute
- Hasteko, nola sortu zen Gazte Mugimendua
eta nola antolatzen zarete?
2011. urtean auzoko gazteriaren
egoeraz jabetzeko gazte diagnostiko bat egin genuen. Bertan atera ziren
emaitzek gazteak bildu eta gazte problematiken inguruan eztabaidatzeko beharra
zegoela zioten et
2012ko maiatzean Gazte Topaketak egin eta bertan erabaki zen egungo
Gazte Mugimendua sortzea. 
Une honetan 8 lantaldek osatzen dute
Txantreako Gazte Mugimendua: Aisialdia, Mahai Kulturala, Lan Mundua,
Etxebizitza Tx, gazteen kritikotasuna sustatzen duen Garunak Astintzen
lantaldea, Euskara, Ikasleak eta Komunikazioa. Honetaz gain, badira Gazte
Mugimenduaren partaide guztiak elkartzen garen hainbat gune. Eta badira ere
auzoko gazte eta koadrilekin harremanak izateko beste espazioak, jaien gazte
egitaraua pentsatu eta prestatzeko Koadrilen Asanblada bezala.
- Beraz, ikasturte bukaeran Gazte
Mugimenduak 4 urte beteko ditu. Nolako bilakaera izan du sortu zenetik gaur
egun arte?
Hiru urte eta erdi urte oso
aberasgarri izan dira, gure hasierako asmoak eta antolatzeko moduak moldatzen
joan gara lanean hasi garen heinean.
Gainera, hiru urte
eta erdi hauetan partaide berriak eta baita belaunaldi berriak batu dira eta
honek ideia eta aire berriak ekarri dituzte.
- Horrenbestez, positibotzat jotzen al duzue
Gazte Mugimenduak orain arte egin duen jarduna?
Zalantzarik gabe. Urtez urteko esperientziak hobe
nola antolatu ikasten lagundu digu, errealitatea hobeki ulertzen eta sistemak
gazte garen heinean zein muga jartzen dizkigun hautematen.
Gainera, gero eta gehiago gara auzoan antolatzen garen gazteak, hori oso
aberasgarria da, eta auzoari egiten diogun ekarpenari garrantzitsua dela
deritzogu.
- Eta gazteriarengan aldaketarik nabaritu al
duzue azken 4 urteotan?
Bai, dudarik gabe esan genezake komunikazioan
aldaketarik handiena egon dela. Informazio
asko jasotzen dugu uneoro eta gure
artean komunikatzeko era guztiz aldatu da ere.
Halere, gazteok auzoan dugun presentzia ikaragarria da eta gure erronka Gazte
Mugimendua are indartsuago egitea da, uste baitugu Txantreako gazteria gai dela
sistema zapaltzaile honi aurre egiteko eta denon artean alternatibak sortzeko.
- Zeintzuk izan dira orain arte egindako dinamikarik
garrantzitsuenak?
Egia esan era askotako dinamikak
egin ditugu urte hauetan zehar, baina batzuk aipatzearren hauek azpimarratuko
genituzke: 2012ko Gazte Topaketak –nola
ez–, etxebizitza topaketak eta Emantzipazio Bulegoaren
sorrera, auzoko kultur egunetarako koadrilekin osatzen dugun Gazte Egitaraua
(jaietako 500 gazteko bazkari erraldoia, kasu), udan egindako hiru Gazte Kanpaldiak,
prozesu feminista, ikasle mobilizazioak, Baratxan baratzaren sorrera,
etxebizitza eskubidearen aldeko dinamika (Uharte 24 kasua, maiatzean egindako “Auzoa Besarkatu” giza katea) eta beste asko.
- Uharte 24ko kasuari dagokionez, oihartzun
handiko kasua izan zen. Nola dago une honetan?
Kasua ez da amaitu. Oraindik ere
Gazte Mugimenduak eta auzoak etxebizitza eskubidearen alde egitea ezinbestekoa
da. Gogoratu behar da Uharte kalean dagon etxea Nafarroako Gobernuaren dela eta
8 urte zaramatzala hutsik, inongo erabilerarik gabe.
Pasa den ikasturtean
Nafarroako Gobernuak desalojo prozesua hasi zuen eta ekainean “usurpazio” delitua egoztera ere iritsi ziren. Epaiketa irailaren
17an hasi zen, Nafarroako Gobernu berriarekin hitz egiteko prozesua hasi genuen
eta pasa den hilabetean etxean bizi den gazteari usurpazio delituaren horren egozpena
artxibatu zen.
Hala ere, desalojo arriskua egoten jarraitzen du prozesu hori ez delako
eten eta aurrera doalako, beraz, auzoari adi egoteko deialdia luzatzen diogu.
- Aurtengo ikasturteari begira, zeintzuk
dira aurtengo lan-ildo nagusiak?
Alde batetik, aurtengo erronka
nagusia gazteei beste bizi eredu bat eskainiko dieten alternatibak eraikitzea
da. Horretarako, lantaldeek alternatiba horiek bideratzen lagunduko duten
proiektuak definituko dituzte. Emantzipazio Bulegoa, etxebizitzaren gaiarekin
adibidez, martxan dago jada, baina beste gaiekin lotuta proiektuak plazaratuko
ditugu, euskararekin, lan munduarekin, aisialdiarekin, kulturarekin...
Bestalde, Gazte Mugimendua sendotzeko lanean ibiliko gara (estrukturalki
zein formatiboki) hurrengo ikasturtean behin proiektuak martxan izango ditugula
auzoko gazteria une garrantzitsu batean egonen dela aurreikusten dugulako. Hala
ere hurrengo ikasturteko une horretaz hitz egiteko goiz da oraindik.
Honetaz gain, gazteriarekiko harremana eta komunikazioa hobetu nahi dugu,
funtsezkoa dela uste baitugu.
- Hara, ez da gutxi. Proiektu horien nondik
norakoren bat aurreratzerik ematen ahal diguzue?
Noski. Aisialdiaren gaiari
dagokionez, 11-15 urteetako gazteei bideraturiko aisialdi proiektu bat jarri
nahi dugu martxan. Kulturaren gaia lantzen duen Mahai Kulturalak, egungo
kultura ereduaren inguruan eztabaidatzeaz gain, auzoko data kulturaletan gazte
egitaraua txertatuko du auzoko koadrila ezberdinen parte hartzearekin.
Garunak Astintzen
taldeak lantzen duen gaiarekin lotuta, hausnarketarako eta eztabaidarako espazio
bat ere sortuko dugu. Lan munduari dagokionez, uste dugu lehenik eta behin
auzoko gazteen egoera sozioekonomikoa ongi ulertzea ezinbestekoa dela
alternatiba bat martxan jartzeko eta diagnostiko horretan ibiliko gara.
Etxebizitzaren gaiarekin,
lehen aipatu dugun Emantzipazio Bulegoa martxan dago jada eta bere
jarduerarekin aurrera jarraituko du, banketxe eta administrazioen etxeen
okupazioa landuko duen Asanblada Okupa sustatzen eta TX Zero alokairu soziala
beste alternatiba bat bezala ere jorratzen.
Euskarak auzoko
gazterian duen presentzia ikusita, euskara ez dakiten gazteei dohako euskara
klaseak eskainiko dizkien Gazte Euskaltegia sortuko dugu eta gazte
euskaldunentzako euskara tarteak prestatuko ditugu. Ikasle mugimenduari dagokionez,
iaz sortutako eta ikasleak, gurasoak eta irakasleak biltzen dituen Hezkuntza
Mahaiari jarraipena emango zaio, LOMCEri plantoa emateko asmoarekin. 
Azkenik, momentu
honetan ditugun komunikazio tresnak erabiltzen jarraituko dugu Gazte
Mugimenduaren jardueraren berri emateko (gure webgunea:
txgaztemugimendua.blogspot.com, sare sozialak eta auzoko eragile ezberdinen
bideoak barnebiltzen dituen TX Telebista kanala Youtuben) eta gazteon
problematikekin harremana duten hainbat eduki zabalduko ditugu.
- Amaitzeko, ze mezu zabaldu nahi diozue
auzoko gateari?
Gazte bezala hainbat problematik
amankomun konpartitzen ditugu. Gainera, problematika amankomun horiek larritu
egin dira azken urteotan eta garaia da guk geuk alternatibak sortu eta sinisten
dugunaren alde egiteko. Alternatibak sortzea posiblea da, horretarako sortu zen
orain dela 3 urte Txantreako Gazte Mugimendua, auzoko gazte ezberdinak bildu
eta problematika amankomunei erantzun amankomunak emateko.
Espazio irekia eta
dinamikoa da Gazte Mugimendua eta auzoko gazteok osatzen dugu. Beraz parte
hartzera animatzen zaituztegu, alternatibekin sisteman zirrikituak egitera eta
azken finean gure buruaren jabe izatera!
