Euskal Herriko neska* gazteon topaketak eginen ditugu ekainaren 16an
Arbizun. Egun osoko egitaraua egonen da: tailerrak, mahainguruak, hitzaldiak,
bazkaria, kontzertuak…
Ez da zerotik abiatzen den zerbait. 2016ko abenduan Euskal Herriko gazte
mugimenduen autogestio topaketak egin ziren Barañainen. Bertan mila gaztek
baino gehiagok parte hartu genuen, eta ildo desberdinetan eman genituen
eztabaida eta hausnarketak. Horietako bat zen feminismoa, eta 200 neska* gazte
baino gehiago elkartu ginen asteburu horretan zehar.
Proiektu desberdinak proposatu eta atera ziren aurrera GaztEraikiren
ondoren. Adibidez, iaz lehenengo aldiz egin ziren gazte udaleku feministak
(aurten berriz eginen direnak) eta taldeetan lantzeko talde-osasun gida. Hilabete
hauetan zehar hausnarketa desberdinak ematen jarraitu dugu: militantzia eredua,
neska* gazte taldeak, diskurtsoa, mugimendu feministan eta gazte mugimenduetan
dugun papera, borrokarako tresnak…
Goizean zehar hainbat tailer eta hitzaldi egonen dira, militantzia
kulturari, iruditegiari, talde-osasunari eta beste gai batzuen inguruan.
Eguerdian mahainguru orokor bat eginen da, ekarpen desberdinak batuko dituena.
Ondoren, bazkaria izanen dugu*, eta bazkalostean kontzertuak.
Hausnarketa kolektiboak ematen jarraitzeko, gure artean saretzeko, Euskal
Herriko txoko desberdinetan egiten ari garen lanketak ezagutzeko, korapilo
zaharrak askatu eta berriak sortzeko, ezinbestekoa dugu espazioak konpartitu,
proposamenak egin, elkarrekin saretzea.
Euskal Herriko neska gazteok batera ekingo diogu, Arbizun elkartuko gara!
@EH_NeskaGazteak
FB: Euskal
Herriko Neska Gazteak
feministagazteak@gmail.com
*Bazkarirako txartelak hemen daude salgai, 10 eurotan: Irurtzunen
(Pikuxar), Uharte Arakilen, Lakuntzan (Sorginak), Arbizun (Arrauts), Bakaikun,
Iturmendin (Ximona gaztetxea), Urdiainen (Kaluxa), Altsasun (Biltoki eta
Lezea), Olaztin (Barandi) eta Ziordian (gaztetxea).
