Gaur arratsaldean "Txantrean hezkuntza duina" dinamikak Txantrea Plazan prentsaurrekoa burutu du Nafarroako Gobernuaren froga diagnostikoak eta PISA azterketak salatzeko eta auzoan martxan jarriko diren dinamiken berri emateko.
(euskaraz)
Prentsaurreko honetan Txantrean orain dela gutxi sortu den dinamikaren
berri eman nahi dizuegu. Txantreako ikastetxeek egun pairatzen duten
prekarietatea eta babes faltarekin kezkaturik, auzoko zenbait guraso, irakasle,
ikasle eta auzokideek iniziatiba hartzea erabaki dugu eta gure artean antolatu
egin gara. “Txantrean hezkuntza duina” sortu dugu. Gure helburuak dira
hezkuntza komunitatearentzako elkargune bat sortzea eta Txantreako ikastetxeen
kalitatearen aldeko dinamikak egitea.
Gure lehenbiziko jarduera hauxe
da: Nafarroako Gobernuaren froga diagnostikoei eta PISAri planto egiteko
dinamika. Gure ustez, hezkuntza sistemaren ebaluaziorako mekanismo horiek, eragin
homogeneizatzaile eta merkantilista dakartzate, LOMCEren helburuekin bat
eginaraziz eta ezagunak zaizkigun errebalidak ezartzeko aurreko pausu bat dira:
-
Homogeneizaziorako
eta zentralizaziorako tresnak direlako. Heziketa prozesuan jasotako edukien zati txikia eta
zehatza ebaluatzen dute, ikasgai instrumentalen edukia nagusiki.
-
Eredu
linguistiko, heziguneen eta ikasleen arteko lehiakortasuna sustatu eta
sailkapena eragiten dute.
-
Azterketak
egiten diren errealitate sozial, ekonomiko, kultural zein norbanakoena aintzat
hartzen ez duelako.
-
Ebaluazio
sistema merkantilizatu eta zirkuitu ekonomikoan ipintzen du. Enpresa pribatuek arlo hau kudeatzen dute eta beraien
interes ekonomikoei begira egiten dute.
-
Urteetako
ikasketa prozesua ordu gutxi batzuetan neurtzen delako. Prozesuan eskuratutako gaitasun eta jakintza guztiak
ez ditu aintzat hartzen; pentsamendu kritikoa, iniziatiba pertsonala eta
sormena adibidez.
Dinamika honen baitan, asanblea
informatibo bat burutu genuen apirilaren 12an Bernart Etxepare eskolan,
bertan gure ikuspuntua azaldu genuen hainbat hezkuntza eragileekin batera.
Gero, apirilaren 17, 18 eta 19an, DBHko 2. mailako 17 ikasleek planto egin
diete Nafarroako Gobernuaren froga diagnostikoei, oztopoak eta xantaiak
pairatu behar izan arren.
UPN/PPren gobernuek hezkuntza
sistemaren kalitatea modu nabarmen hondatu ondoren: LOMCE inposatu, ratioak
igo, ordezkapenak 15 eskola egunetara atzeratu, irakasleen lan-baldintzak
prekario bihurtu, irakasleen behin-behinekotasuna, ikastetxeetarako
aurrekontuen murrizketa... “Aldaketaren gobernuaren” jarduteko modua
harrigarria gertatzen zaigu, urteetan UPN/PPko gobernuek eragindako txikizioa
konpondu ez ezik, froga diagnostikoak ezartzen jarraitzen du, hezkuntza
eragileekin inolako adostasunik izan gabe.
Arrazoi hauengatik, Apirilaren azken
15 egunetan eta maiatzean auzoan sinadura bilketa bat egiten ari gara, Nafarroako
Gobernuari eskatzeko, hezkuntza eragileekin adostasunetara heldu beharra duela
eta bitartean ez dezala froga diagnostiko gehiagorik egin. Sinadurak LHko
6.mailako azken azterketa egin bezperan aurkeztuko ditugu.
Gainera, LHko 4.eta 6.mailako
froga diagnostikoei eta DBHko 4.mailako PISA frogei plantoak prestatzen
jarraitzen dugu. Gonbidapena luzatzen dizuegu hezkuntza komunitateko partaide
orori eta auzokideei eskaera sinatzeko, plantoetara bertaratzeko eta
dinamika laguntzeko.
