Esperientzia positiboz beteriko Gazte Kanpaldia

Gazteria saretu, harremanak egin eta gazteak ahalduntzea helburu, beste urtez ospatu da Txantreako Gazte Kanpaldia. Orain arte Uitzin egin da kanpaldia eta aurten, formatu berri batekin, Allotzeko urtegia izan du kokaleku. 

Leku aldaketaz gain, hainbat berrikuntza izan ditu aurtengo kanpaldiak. Adibidez, lehenbiziko eguna Garisoain herrian pasatzea edota kanpaldian zehar proba ezberdinen bidez jokaturiko Kolunpiadak. Bost talde, bakoitza bere izen, banderola eta guda ohiuarekin proba ezberdinak egin eta puntuak lortzeko. Hala ere, berdinketa bikoitza egon zen sailkapenean, Konpiadak oso berdinduak izan zirelaren seinale.

Bestalde, Auzoa ezagutzen tailerraren bidez auzoan egondako hamaika borroka ezagutu genituen, eta nola gaur egungo auzoko esparru anitz herri mugimenduaren borroken ondorio direla (gaur egungo Bernat Etxepare ikastetxea aurretik egondakoen eta euskararen aldeko borrokaren ondorio, Andraize herri mugimendutik sortua eta Estatuan aintzindari izan zela, Irubide parkea, Olentzero, Egunsenti haur eskola, Euskaltegia, Auzolan aldizkaria eta bere aurretik egondakoak, Txantreako Jaiak eta pairatu izan dituzten hainbat oztopo, Herri Parkearen lorpena, etxebizitza eskubidearen aldeko mugimendua eta Auzoa Besarkatu giza katea…). Beste motako tailerrak ere egin genituen, Nolakoa da mundua? tailerra, pentsamendu hegemonikoa eta pairatu eta baita burutzen ditugun zapalkuntzen ingurukoa, Hartu emanak? deituriko harremanen inguruko eztabaidatxoa eta bestetan ere egindako birziklapen tailerra eta xamurtasun tailerra. 

Eguraldiak lagundurik, urtegian bainatzeko, jolas ezberdinetara jolasteko eta elkarrekin ondo pasatzeko aukera pila ere izan genituen, aspertzeko denborarik eduki gabe, egunerokotasunean egiten ez ditugun gauza asko egiteko aukera baitaude Gazte Kanpaldian.

Ikasturtean zehar indarberriturik aritzeko esperientzia positibo asko eskaini ditu aurtengo Gazte Kanpaldiak, eta irailan hasiko den ikasturteari begira baliotsua izango delakoan gaude.

Ikasturte berria berezia eta ezberdina izango denez, honi begira asanblada orokor pare bat eginen dira eta horietako batean kanpaldiaren argazki eta bideoak ikusiko ditugu. Lehena abuztuaren 9an ospatuko da, parte hartu nahi duen ororentzat irekia. 19:30tan izango da, Auzotegin.